O Día das Letras Galegas dedícaselle este ano 2023 ao laurentino Francisco Fernández del Riego. Por este motivo, Vedra medra co alumnado de 3.º ESO desprazouse á Mariña lucense para visitar a vila natal do escritor, Vilanova de Lourenzá.
Alí, da man do servizo de turismo do concello, realizamos unha visita cultural guiada.
Preme na imaxe para acceder ao album |
Os centros de interese sobre os que xirou a visita foron: a exposición “110 anos de Del Riego” que puidemos ver no salón de actos da casa do concello onde tamén tivemos ocasión de asistir á proxección do audiovisual “D. Paco volve a Lourenzá”.
Percorremos Vilanova coa axuda da audioguía “Vilanova de Lourenzá vista por don Paco”, que nos permitiu reparar e coñecer detalles da súa casa natal, atravesar a rúa Principal, a glorieta de Xulia Minguillón, a travesía da Mariña ata chegar á praza do Conde Santo. Despois entramos na igrexa de San Salvador, unha das xoias do barroco galego. E diante do sartego de Osorio Gutiérrez, O Conde Santo, escoitamos o que a tradición e a historia contan deste nobre, fundador do mosteiro de San Salvador.
Dirixímonos logo ao Centro de Interpretación da Faba, produto local con denominación de orixe, no que aprendemos sobre o cultivo e o procesado da faba de Lourenzá. Recordábase alí o pregón que don Paco lera na 8.ª edición da Festa da Faba en 1998.
Finalizou o noso percorrido na mostra de xoguetes tradicionais que se pode ver nun local sito na praza de César Chavarría. Esta mostra recolle os traballos feitos e publicados polos laurentinos Manuel García e Xosé López sobre o mundo lúdico tradicional. Xúntanse na sala con textos de don Paco en que recorda os xoguetes cos que el e os seus amigos xogaban na Vilanova da súa infancia.
Lembremos que este curso 22-23, o noso proxecto chámase O Camiño tamén dá xogo, e Lourenzá agasallounos dobremente ao poder poder participar na dita mostra e ao ser concello, coma Vedra, polo que pasa o Camiño.
Xulia Marqués
Coordinadora do EDLG e de Vedra medra
Comentarios
Publicar un comentario
Os comentarios están moderados. Por favor, sé respectuoso e coida a redacción para ser ben comprendido. Non se admitirán comentarios anónimos.